Ref-Culture
Kanè
Jounal tout pwofesyonel sektè ledikasyon ak kilti
Kreyasyon Kanè se manifestasyon volonte Ref-kilti pou kolabore ak tout aktè sektè ledikasyon ak kilti nan peyi a.
Jan nou konen deja prensipal dyòb Ref-Kilti bay tèt li se fè pwomosyon edikasyon kiltirèl ak atistik.
Sa fè dizan n ap fonksyone. nou remesye tout kolaboratè nou yo ki akonpaye nou nan travay sa. Jodi a sitiyasyon peyi mande pou nou fè plis efò toujou. Se pou sa nou kreye Kanè yon fason pou sanble enfòmasyon sou sektè yo men tou, pou sanble fòs tout pwofesyonèl yo nan ankourajman y ap jwenn lè nou tout nou okouran sa nou chak ap fè bò kote pan nou.
Kanè se yon jounal ki vle rann kont reyalite ledikasyon ak kilti, sa vle di tou, reyalite aktè sektè sa yo. Direktè lekòl, pwofesè, fonksyonè ministè Edikasyon, fonksyonè ministè Kilti, operatè kiltirèl elatrie Kanè se pou nou.
Se pou sa nou gen ribrik sou politik sektè yo, sou ekonomi yo, sou kesyon sosyal, sou kesyon pedagoji, sou kesyon lalwa epi tou sou aktyalite ledikasyon ak kilti nan peyi a.
N ap envite tout lektè reyaji, li ka fè komantè, li ka voye nouvel tou sou ekperyans l ap viv.
Menm jan yon pye bwa jwen enèji nan latè ak nan solèy, se konsa edikasyon yon peyi jwenn fòs li nan kilti peyi a.
Nou kwè nan pawòl sa, nou kwè se konsa nou ka fè lekòl la rasanble nou olye li divize n.
Nimewo sa mete pye nou deyò nou swete fè bèl nòt avèk ou.